प्रेस काउन्सिल नेपालका कार्यवाहक अध्यक्षसमेत रहनुभएका विश्व प्रेस काउन्सिलका प्रथम उपाध्यक्ष किशोर श्रेष्ठको अध्यक्षतामा विश्व प्रेस काउन्सिल कार्यकारी समितिको बैठक कार्तिक ३० गते भारतको राजधानी नयाँ दिल्लीमा सम्पन्न भयो ।
उक्त बैठकले विश्व प्रेस काउन्सिलको सचिवालय नेपालमा राख्ने निर्णय गरेको छ । सचिवालय राख्ने सम्बन्धमा अन्य देशका प्रतिनिधिको स्पष्ट भनाइ आउन नसकेपछि बैठकको अध्यक्षता गरिरहनुभएका श्रेष्ठले सचिवालय राख्न नेपाल तयार रहेको प्रस्ताव गर्नुभएको थियो । सो प्रस्तावलाई बैठकले सहर्ष स्वीकार गरेको हो ।
बैठकले म्यान्मारको काउन्सिल सदस्यता स्वीकृत गर्ने, अन्य देशका प्रेस काउन्सिललाई सदस्यता लिन सार्वजनिक आव्हान गर्ने, श्रीलङ्काको सदस्यता निरन्तरताका सम्बन्धमा अर्काे बैठकमा छलफल गर्नेजस्ता निर्णयहरू गरेको छ ।
बैठकमा नेपालसहित भारत, बंगलादेश, श्रीलङ्का, माल्दिभ्स, म्यान्मार, ताञ्जानिया, जिम्वाबे, केन्या र अजरबैजानका अध्यक्ष, उपाध्यक्ष तथा प्रतिनिधिहरूको सहभागिता थियो । यस्तै पुनः छलफल गरी अर्काे बैठकको टुो लगाइने बताइएको छ ।
साप्सी गठन
यसैबीच दक्षिण एसियाली राष्ट्रका प्रेस काउन्सिलहरूबीच सोही अवसरमा बसेको बैठकले भारतीय प्रेस परिषद्का अध्यक्ष न्यायाधीश चन्द्रमौलीकुमार प्रसाद तदर्थ अध्यक्ष रहने गरी प्रेस काउन्सिलहरूको दक्षिण एसियाली गठबन्धन गठन गरेको छ । सदस्यमा नेपाल, श्रीलङ्का, पाकिस्तान, अफगानिस्तान, बंगलादेश र माल्दिभ्स रहेका छन् भने म्यान्मार पर्यवेक्षक छ । गठबन्धनको घोषणा फेब्रुअरी १४ का दिन बंगलादेशको राजधानी ढाकामा हुने अर्को बैठकले गर्नेछ ।
सार्क राष्ट्रकेन्द्रित सो गठबन्धनको साधारणसभाको गणपूरक संख्या कम्तीमा तीन देशका प्रतिनिधि र एक देश एक भोट रहने छ भने सुरुमा प्रत्येक सदस्य राष्ट्रले एक हजार अमेरिकी डलर रकमबराबरको कोष खडा गर्ने र सदस्यता शुल्क वार्षिक ५०० सय डलर लिने निर्णय गरेको छ । साप्सीको अर्काे बैठक आगामी फेब्रुअरीमा बंगलादेशको राजधानी ढाकामा बस्नेछ ।
यसैबीच भारतीय राष्ट्रिय प्रेस दिवसको अवसरमा भारतीय प्रेस परिषद्द्वारा ‘मिडियासामु चुनौतीहरू’ विषयक अन्तक्र्रियात्मक कार्यक्रम आयोजना गरिएको थियो । सो अवसरमा विश्व प्रेस काउन्सिलका प्रथम उपाध्यक्ष एवं प्रेस काउन्सिल नेपालका कार्यबाहक अध्यक्ष किशोर श्रेष्ठले नेपालको मिडियाको अवस्था, चुनौती, आचारसंहिता उल्लंघन र कारबाहीलगायतका विषय समेटी ‘कन्ट्री रिपोर्ट’ प्रस्तुत गर्नुभएको थियो ।
भारतसहित अन्य नौ देशका अध्यक्ष, उपाध्यक्ष एवं प्रतिनिधिहरूले पनि मिडियाको वस्तुस्थिति, चुनौतीलगायतका विषय समेटी आ–आफ्नो देशको रिपोर्ट प्रस्तुत गरेका थिए । समग्रमा सबै देशका मिडियाजगत्का समस्या र चुनौतीहरू साझा बताइएका थिए । सबै प्रस्तोताले पत्रकार ‘फेक’ र ‘पेड न्युज’ तिर आकर्षित भएको, आचारसंहिताको कम पालना भएको देखिएको, अनलाइन र सामाजिक सञ्जालमार्फत गैर–जिम्मेवारीपूर्ण सूचना प्रवाह हुने गरेको, पत्रकार र मिडियासमेत पार्टीमा विभाजित भएको, श्रमजीवी पत्रकारले समयमा र राम्रो पारिश्रमिक पाउन नसकेको, पत्रकारमा सीप, दक्षता, साधन–स्रोतको कमी रहेको विषय औँल्याएका थिए । म्यान्मारका प्रतिनिधिले भने मिडियासम्बन्धी कतिपय पुराना कानुन र सरकारको अनुदार व्यवहारका कारण प्रेस स्वतन्त्रताको पूर्ण अभ्यास गर्न नपाएको बताए ।
विभिन्न देशको प्रतिनिधिमण्डल भारतीय राष्ट्रिय प्रेस दिवसको स्वर्ण जयन्ती वर्ष समापनका अवसरमा ३० कात्तिकमा विज्ञानभवनमा आयोजित ‘राष्ट्रिय प्रेस दिवस’ तथा उत्कृष्ट पत्रकारिता राष्ट्रिय पुरस्कार समारोह–२०१७ मा पनि सहभागी भएको थियो । सो कार्यक्रमलाई भारतका उपराष्ट्रपति एम. बैंकेटैया नायडू र सूचना तथा प्रसारणमन्त्री स्मृति जुबिन ईरानीले संबोधन गर्नुभएको थियो ।
भारतीय प्रेस परिषद्को निमन्त्रणामा कार्यबाहक अध्यक्ष किशोर श्रेष्ठको नेतृत्वमा काउन्सिलका सहप्रशासकीय अधिकृत दीपक खनाल र मिडिया एक्सन नेपालका अध्यक्ष लक्ष्मणदत्त पन्तसहितको तीन सदस्यीय प्रतिनिधिमण्डल कार्तिक २८ गते त्यसतर्फ प्रस्थान गरेको थियो । नेपाललगायत सहभागी सम्पूर्ण देशका प्रतिनिधिको सम्मानमा भारतीय प्रेस परिषद्का अध्यक्ष न्यायाधीश चन्द्रमौलिकुमार प्रसादले कार्तिक २९ गते रात्रीभोजको आयोजना गर्नुभएको थियो ।
प्रतिक्रिया :